|
Danie
Guest
|
 |
« on: February 15, 2008, 09:03:57 PM » |
|
Ons, die mense van Suid Afrika, belowe om nooit weer politici, ongeag hulle geslag, ras of politieke affiliasie, te vertou nie.
Nie met ons toekoms nie ; ook nie met ons verlede nie.
Ons sal skepties wees oor wat elke stadsraadlid, elke parlementslid, elke kabinetslid, en selfs die president sê en doen.
Ons sal twyfel in hul vermoê om oor hul eie belange en ons belange te onderskei.
Ons sal sinies luister na hulle beloftes aan ons - beloftes vir huise vir ons almal, vir veiligheid, werksgeleenthede, goeie skole en hospitale, goeie, lopende water, elektrisiteit en ander basiese dienste.
Ons sal twyfel oor die toekenning van Staatskontrakte, die goedkeuring van paroolvoorwaardes, en die kies van sportspanne.
Ons sal op sypaadjies en langs paaie staan wanneer politieke konvooie met loeiende sirenes verbyjaag - ons sal daar staan en wonder of die mens agter die donker getinte motorvenster weet wat ons weet, vrees wat ons vrees, droom wat ons droom, en bid wat ons bid.
Ons sal op sportstadions sit en kyk na die stippels in swart pakke doer bo in die Presidents - losie op die hoof paviljoen, en wonder of hulle weet die spel op die veld behoort eintlik aan ons. Ons koop die kaarjies en ondersteuningstruie en vlae - en ons skree ons kele rou, ons verf ons gesigte, ons drink die brandewyn wat op ons span se truie geadverteer word.
Ons, die mense van Suid Afrika, belowe ook dat wanneer n politikus op Tv sal verskyn, elke keer wanneer dit gebeur, sal ons ons koppe in stilte laat sak, as blyk van meegevoel met die verdrietige manier waarop woorde mishandel word.
Ons sal skepties wees oor elke individu, elke maatskappy en elke instelling wat meeding om die gunste en gawes van politici, sakelui, regslui, mynmagnate, ekonome, wapensmouse, konsultante, beeldpoetsers, makelaars, kulturele leiers, tradisionele leiers, bendeleiers, en ander pryssangers.
Die beendere ratel in die grafte.
Die beendere van Pieternella van die Kaap, en Hendrik Biebouw, en Steve Biko ratel in die grafte.Die beendere van Sol Plaatjie, Jopie Fourie, Bram Fisher, Adam Kok, tant Sara Rall, MER, Generaal Piet Cronje, Jonas van Tonder, en die koppige Generaal Ben Viljoen.
Ons eer, met begrip vir die ongeregtighede van die verlede, diegene wat swaargekry en opgeoffer het vir geregtigheid en vryheid.
Maar ons sal ook nie toelaat dat die ongeregtighede van die verlede ons blind maak vir die ongeregtigheid van die hede nie.
Ons sal nie die ongeregtighede van die verlede gebriuk om die ongeregtighede van die hede te regverdig nie.
Ons sal die waardigheid van alle mense respekteer en verdedig, maar wanneer politici of hul vennote - veral uit die sakewêreld - aan ons voorskryf hoe om dit te doen, sal ons skepties daaroor wees.
Net soos ons skepties oor politici se definisie van geregtigheid.
Een mens se geregtigheid is n ander mens se fortuin.
Een mens se geregtigheid is die begin van nog n ampstermyn van n politikus.
Een mens se geregtigheid is nog n plaasmoord, nog n bankroof, nog n werker wat met n tou agter n bakkie aangesleep word.
Ons sal ook skepties wees oor die kerk en godsdienstige leiers se verhouding met die politiek en politici, daarom sal ons ons nie laat mislei deur ouderlinge en predikante, jogi's, imams, geestelike raadgewers of teoloë, wie se monde met politici se tonge praat nie.
Ons besef ons is die pionne in n politieke skaakspel. Wat op die effektebeurs in New York, London, en Tokio gebeur, raak sefs n plaaswinkeltjie op Mokopani in die Bosveld.
Maar ons weet ook Woolworths, Vodacom, Coca Cola, of die Departement van Buitelanse Sake - geen groot maatskappy of regering kan handel dryf in geloof nie, of hoop nie, of liefde nie.
Om te glo en te hoop en lief te hê is iets wat sleg ons - die mense van Suid Afrika, kan doen - ons, aan wie hierdie land behoort.
! Ke e:/xarra // ke
Nkosi sikelel' iAfrika
Ons vir Jou Suid Afrika
|
Forum
